أرنوب الفرحان وحكايته مع الصيام

أرنوب : صباح الخير يا أولاد .. ياتري أنتوا عارفين أنا مين وليه فارحان وانتوا عارفين أنا فارحان ليه؟..عشان إحنا بدينا الصيام وأنا صايم.. وباكل جزر .

(يدخل البائع)
أصل أنا بحب الجزر خالص وأنا هاروح السوق علشان اشتري جزر
البائع : ياللا اللي عايز يشتري أي حاجة .. أنا عندي خضر وفاكه ولحمة وكل حاجة .. ياللا كيلو الجزر بنص جنية .. وكيلو الجزر بعشرة جنية
أرنوب : الله .. أنت عندك حاجات كتيرة حلوة خالص .. جزر وفاكهة ولبن ولحمة .

البائع : أهلا يا ارنوب .. أيه رأيك تشتري لحمة ولبن وبيض .

أرنوب : أنا بحب اللحمة واللبن خالص .. بس اعمل أيه .. أنا صايم لا يا عم أنا عايز جزر بس .. مالو حلو الجزر .ز مش الجزر بيقوي الجزر .. أنا لو كلت لحمة هافطر ولو فطرت هاكون زعلان مش فرحان .

تعلوب : أنا هاروح عند زملاتي والعب معاهم .
فلافيلو : أهلا ازيك يا ارنوب عامل أيه ؟ أنت عارف فوفو فضل يقول عليك كلام كتير خالص .. فضل يشتم عليك ويقول : ارنوب ده مش كويس وعبيط وعنده قرنين وشكله وحش خالص عامل زي أمنا الغولة
أرنوب : صح .. فوفو قال كده .. ماشي يا فوفو .

أما وريتك وهو فين عم فوفو ؟
فلافيلو : هو جاي هناك .. بس أوعى تقله أني أنا قلت لك حاجة .
فوفو : أزيك يا صاحبي ارنوب .. كل سنة وأنت طيب علشان الصيام .

أرنوب : أنت يا فوفو وحش ومش كويس وعبيط وأنت اللي شكلك وحش وعامل زي القرد.
فوفو : ماتشتمش يا ارنوب .. أنا سكت لك .

أرنوب : لا أنا ها شتمتك وأعيب عليك كمان .. ده أنا كمان ها أضربك وهخليك مشوه خالص .

(ويتشاجرون معا)
(يدخل الأسد)
الأسد : أيه اللي بتعملوه ده .. أنتوا بترضبوا بعض .. بس يا ارنوب خليك كويس .. وسيبه .. يا فلافيلو أنت سايبهم يضربوا بعض .

فلافيلو : أنا ماليش دعوة .. لحسن أخد لي خبطة وأروح المستشفى
(ويأخذ الأسد الأرنب )
الأسد : أيه اللي بتعلمه ده يا أرنوب .. أنتا نسيت انك أنت صايم واللي بيصوم المفروض ما يضربش زملاته ..أنت غلط يا أرنوب .

أرنوب : فعلا أنا غلط .. المفروض أكون صايم وفرحان يا فوفو يا فوفو .. أنا متأسف خالص خالص أنا شتمتك وضربتك .

فوفو : خلاص يا ارنوب وأنا كمان أسف وإحنا زمايل وأصحاب ولازم مانشتمش بعض ولا نضرب بعض علشان ربنا يسوع ينبسط منا

(ثم يخرج فوفو وفلافيلو ويدخل دبدوب )
دبدوب : أهلا يا ارنوب .. وازيك يا أسد .. عاملين أيه ؟ أنتوا شايفين بابا جابلي فلم وشكاه حلو خالص وكمان بينور في الضلمة . أنا فارحان بيه خالص ..

وانت يا أرنوب ماعندكش قلم زيه شكله حلو كده ؟
أرنوب : لا ماعنديش قلم حلو زيك .. يا بختك يا عم عندك حاجات حلوة خالص .. أشمعنا أنا ..
دبدوب : يا أسد أنا عايزك في موضوع مهم خالص بره .

(ويخرجون وينسى دبدوب القلم)
أرنوب : أيه ده دبدوب نسى القلم بتابعه .. الله ده شكله حلو وبينور .. أيه رأيك يا أرنوب لو خدت القلم ده ومافيش حد شايفني دبدوب ما يعرفش إن القلم وقع منه .. ماشي أنا هاخد القلم وأشيله
( ويدخل الأسد)

الأسد : أيه اللي ماسكه ده يا ارنوب ؟
أرنوب : لا مافيش حاجة .. مافيش حاجة .
الأسد : لأ في حاجة ماسكها في أيدك .. وريني كده ..مش ده القلم بتاع دبدوب .

أرنوب : لأ ده بتاعي أنا ..أنا اشتريت واحد زيه .
الأسد : أنا متأكد إن ده بتاع دبدوب وبالأمارة هو بينور .. ليه عملت كده يا أرنوب .. مش احنا صايمين ومفروض ما ناخدش حاجة مش بتاعتنا .

أرنوب : أيوه أنا غلطت لتاني مرة وسرقت حاجة مش بتاعتي .. خلاص أنا هارجع القلم لدبدوب وأتأسف له .

( ويدخل دبدوب)
دبدوب : يا جماعة القلم بتاعي ماحدش شافه ؟
ارنوب : بصراحة يا دبدوب .. أنا اخدت القلم بتاعك وكنت هاشيلة .. أتفضل القلم بتاعك وأنا أسف خالص ومش هاعمل كده تاني خاصة وأنا صايم .

(يخرج دبدوب والأسد )

أرنوب : أنا تعبت خالص انهاردة .. أنا اروح أنام لي شوية .
أم ارنوب : يا ارنوب .. أصحى يا ارنوب .

أرنوب : ايوه يا ماما سيبيني شوية أنا نعسان خالص .
أم أرنوب : ياللا يا أرنوب وبلاش كسل .. ياللا أصحى لحسن أقول لبابا .

أرنوب : أديني صحيت ..صباح الخير يا ماما .. عايزة أيه .
أم أرنوب : ياللا قوم اغسل وشك .. وأنا هاروح أجهز لك الأكل بص يا ارنوب .. روح اشتري حاجات للبيت روح للسوق وأشتري جزر وعيش وبرسيم كمان .

أرنوب : يوه يا ماما .. كل يوم كده تنزليني اشتري حاجات.. ما ليش دعوة أنا مش هاشتري حاجة خالص وكمان هنام تاني .
أم أرنوب : عيب كده يا أرنوب خليك مطيع وأسمع الكلام .

أرنوب : قلت مش هاروح يعني مش هاروح .. بصي يا ماما أنا بالليل هأنزل اللعب في الشارع .
أم ارنوب : لأ يا ارنوب ..غلط كده .. في الشارع ممكن توسخ نفسك وفي ناس مش كويسة.

أرنوب : ماتحوليش يا ماما أنا هانزل اللعب في الشارع .
أم أرنوب : ما ينفعش كده ..أنت مش بتسمع الكلام خالص .. أنا هاقول لباباك وهو يتصرف .

(ثم تخرج الأم)
أرنوب : أنا هاروح افتح الدولاب واخد المقص اللعب بيه قبل ما ماما تشفني
أم أرنوب : ايه1ده يا ارنوب .. مش ميت مرة قلت لك متلعبش بالمقص لحسن تتعور
أرنوب : متخفيش يا ماما المقص مش ها يعمل حاجة خالص وعلى العموم انتي روحي يا ماما وكملي الأكل وأنا هاشيله .

أم أرنوب : ماشي يا ارنوب أشوف أخرتها معاك .
أرنوب : آه .. آه أنا اتعورت في المقص .. الحقيني يا ماما .. أنا اتعورت .. أنا سحت دم يا ماما.. يا ماما.

أم أرنوب : شفت يا ارنوب علشان أنت مش بتسمع الكلام .. أديك اتعورت وقاعد تبكي .. مش أنت صايم يا ارنوب والمفروض تسمع الكلام .

أرنوب : أنا أسف خالص يا ماما .. وأنا بعد كده ها اسمع الكلام وأكون ولد مطيع .. علشان أكون أنا ارنوب الفرحان وربنا يفرح بي .

تعلوب : ( ينادي من الخارج ) ؛ يا ارنوب .. يا ارنوب ..
أم أرنوب : يا أرنوب كلم زميلك تعلوب بينادي عليك وعليك وعايزك .
أرنوب : يا ماما سيبك منه أنا مش فاضي .

أم أرنوب : أكيد تعلوب بينادي عليك علشان تروح الكنيسة وتحضروا مدارس الأحد .. انهاردة الجمعة .

أرنوب : يوه يا ماما .. أنا عاوز أتفرج على التلفيزيون .. علشان انهارده في برنامج أطفال حلو خالص .. ماتيجي يا ماما تتفرجي عليه معايا ..

(تعلوب ينادي)
تعلوب : ياللا يا ارنوب .. ميعاد الكنيسة جه .. وإحنا أتأخرنا.
أم أرنوب : يا أرنوب .. عيب كده .. زميلك عمال ينادي عليك قوم وبطل كسل وابقي اسمع البرنامج بكرة .

أرنوب : بصى يا ماما .. سيبك منه .. هو هايفضل ينادي وصوته يوجعه وبعدين يمشي لوحده .. بس أنا عارف تعلوب ده صوته عامل زي الراديو مش هايسكت أبدا.

(ثم يدخل تعلوب)
تعلوب : أيه يا عمي عمال أنادي عليك .. أنت مش سامعني خالص ولا مطنش .

أرنوب : روح أنت يا تعلوب علشان ما تتأخرش أصلي أنا مش فاضي .
أم أرنوب : عيب كده يا ارنوب .ز روح الكنيسة مع زميلك تعلوب .

أرنوب : آه يا بطني .. آه يا بطني .. الحقيني يا ماما .. عندي مغص .. بطني وجعاني هاتولي الدكتور .

أم أرنوب : روح أنت يا ابني يا تعلوب الكنيسة علشان متتأخرش وأنا هاتصل بالدكتور .
تعلوب : طب سلام يا ارنوب وربنا يشفيك .

(يخرج تعلوب)
أرنوب : هيه .. أنا ضحكت عليكوا .. أنا مش تعبان وكنت بأمثل على تعلوب علشان تعلوب يمشي أصل هو لزقه .

أم أرنوب : أيه اللي بتعمله .. ده ما يصحش .. أنت مش عايز يروح الكنيسة .
أرنوب : خلاص يا ماما .. هي جت من أسبوع .. أصل البرنامج حلو خالص .

(يأتي الأستاذ مع تعلوب)
الأستاذ : مالك يا ارنوب .. تعلوب قال لي إن أنت تعبان خالص وأنا جاي أزورك واطمن عليك .. أنت عامل أيه دلوقتي .

أرنوب : في الحقيقة يا أستاذ .. أنا ما عنديش حاجة خالص وأنا كنت بامثل علشان ما اروحش الكنيسة .

الأستاذ : لأ .. أنت غلط يا ارنوب مش أنت صايم ومفروض كل أسبوع تروح الكنيسة وتسمع الدرس علشان تكون واد حلو وكويس وبابا يسوع يكون فرحان بيك

أرنوب : أنا متأسف خالص يا أستاذ .. وأنا عارف أني غلطان ومش هاعمل كده تاني .. والأسبوع الجاي هاروح الكنيسة من بدري خالص ..
الأستاذ : أنت أتعلمت يا ارنوب .. أن إحنا زى ما صايمين نعمل حاجات حلوة ..

المفروض ما نشتمش ولا نتخانق مع زملاتنا وأخواتنا وكمان نسمع كلام
بابا وماما .. وكل أسبوع نحضر الكنيسة مش كده يا ارنوب .

أرنوب : أيوه يا أستاذ وأوعدك أني هابقى كويس .
الأستاذ : عشان كده يا ارنوب .. أنا جبت لك هدية حلوة خالص معايا وهي جزر
كتير عشان تكون أرنوب الفرحان.